« Lé vyé, i sort lwin é lé natirèl ? Oblizé lé méyèr ! » : lo zargiman fallacieux #1

bullshit

Ala in tit ke lé long pou lans inn ti séri lartik si sak i apèl bann zargiman « fallacieux ». Mé kosasa ?

Dan in diskour, in débatkoz, in lartik, in vidéo ou in kozé si in sizé ninportkèl, souvandéfwa ni itiliz – fespré ou non – zargiman ke parèy lé lozik, mé ke o final li lé bazé si pa gran soz. « Fallacieux » i vé dir « tronpèr », « mantèr ».
Dan so séri, nou sa esplik koman i mars é koman lo bann zargiman lé itilizé, ek zégzanp la vi toulézour.

Pou so promyé lartik, nou sa intérès a nou a trwa zargiman fallacieux ke lé « a la mode » koméla : lapèl a légzotism, lapèl a lansyinnté é lapèl a la natir. I pé fé tronpé mé toute lo bann zargiman fallacieux i apèl pa « lapèl a in nafèr » (sa lé di).

Lapèl a légzotism

wellness_massage_sound_massage_singing_bowl_massage-982405
In massaz ek bol de chant tibétin (image PxHere, CC0 Domaine public)

Sa in largiman ke i fé krwar a ou ke in zafèr lé méyèr ryink paské li sort de in kiltir ke lé lwin.
Sak lé mi an valèr dann so zargiman-la, sé lo swadizan « sazès » sinonsa pli « dou » – é donk pli éfikas – de lo bann pratik tradisyionèl zis paské lé diféran é ke i sort de in péi lwin.
Par égzanp, nadmoun i pans ke l’acupuncture ou lo Feng Shui lé byin zis paské i sort an Azi. Nou pé osi mazine ke bann zabitid alimantèr ou lo pratik shaman lo bann pèp i sort in landrwa pèrdi i sony bann maladi ke lo bann doktèr té fine di ke i giny pa géri paské… Paské. Pou konèt, i fo mèt an plas bann protokol éspérimantal byin prési si in gro lansanm domoun ke i sa permèt de trouv in lyin de cause à effet, konstat in korélasyion ke na pwinn lyin ek sat nou vwa, sinonsa pa ryin.
Shakinn néna a aprann de lot, dan la réysit dan lérèr, é lé bon minm. Mé la pa paské in pèp i viv lwin la vil, ousa na pwin bonpé doumoun, ke li lé myé ou an malizé ; shak kiltir i pé èt dan lérèr.
Pou fini, largiman lapèl a légzotism la lé la paské nou kalkil ke na nou, bann kiltir Loksidan sinonsa oksidantalisé in koté, é banna lot koté, ek kissa détrwa néna la fasinasyion par lo swadisan nafèr plis « natirèl », sinonsa plipir, « primitif ».  Nou sa vwar sa zistéman la.

Lapèl a lansyinnté

Lille_PdBA_isabey_cabinet_alchimiste
Lo latélyé in lalshimiste, Louis Gabriel Eugène Isabey, 1845

I apèl sa osi largiman l’historicité : « I fé sa dépi dé milénèr, donk lé éfikas », « Produi-la lé aprésyé dépi 1860 ! », « Tizane mémé lé pliméyèr ke out bann médikaman » etc etc.
La pa paské in nafèr lé in tradisyion ou ke zansèt la fé ke lé oblizé lé méyèr pou nou, pou la sosyété, pou lanvironman ; na pwinn rapor ant si ou lé vyé é si ou na rézon.
Na dé pratik ke lé ansyin ki, dan lo méyèr i marsh pa, dan lo pir lé danzéré (dan lo sans mové). Na détrwa moun i sa pétèt pans an promyé lé zégzanp l’homéopathie ek la saignée (lo dalo si zot i préfèr konm té i di tann dan lontan). Lo promyé la pa prouv okin léfikasité klinik plis ke lo léfé placebo (ke nou sa koz dési dan in proshin lartik), é lo dozyinm la arété paské té i marsh pa, té i baz a li si in téori san okin baz syiantifik (téori des humeurs), é té sirtousa danzéré (blésir grav, inféksyion, ziska la mor nadfwa).
Koméla, la saignée i fé ryink si bann maladi espésyal (konm bann hémochromatose) é plis ankadré é mwin an boushri ke dann tan XVIIe sièk. Pou l’homéopathie, minm si i fé pa ryin dirèktoman, li améliore pa plis lo gérizon. Sak i fé ke pratik-la i kontinyé, lé an parti paské lé ansyin (dé sièk). Krwar ke lé oblizé in zafèr ansyin i sony myé ke bann médikaman koméla i partisip o bann zéfé kontektyièl (ou si mi fors lo langaz, léfé placebo).
In tralé domoun i may homéopathie ek phytothérapie ke lé lo sonyaz ek plant é zot principes actifs « natirèl ». Dayèr, eské si lé « natirèl » i vé dir ke lé pliméyèr pli éfikas ? Spoiler alert : non.

Lapèl a la natir

PIXNIO-1942842-1200x900
Lo swin ek plante (image Pixnio, CC0 Domaine public)

Largiman lapèl a la natir sé di ke in zafèr lé byin zis paské lé natirèl.
Lo marketing ek la piblisité i itiliz largiman-la dépi lontan ; nou la vi aparèt lo term « 100% natirèl » si détrwa produi par égzanp. Domoun i pans osi ke bann produi « bio » lé mwin mové ke sat lé pa « bio ». I mèt osi plizanplis an avan lo swin ek plante, konm la phytothérapie, sinonsa lo tizane préskri par nout bann tizanèr La Rényion. Lé posib ke nad produi natirèl lé vréman bon pou nout santé, mé lé pa forséman vré. Na détrwa i sa pa fé ryin é dot ke i pé èt mové osi. I fo konèt osi ke la plipar principes actifs ke i trouv dann médikaman i sort de plante, frui, zégim ou grinn, mé la fine prouvé ke lé éfikas.
Sak lé natirèl (donk swadizan pli gayar) lé souvandéfwa an lopozé de sak lé « shimik » (donk swadizan mové), alor ke toute lé shimik paské toute matyèr néna zatome anndan ! La shimi sé in syans ke i étidi sak i konstiti la matyèr, ek son bann zintéraksyion é transformasyion.
Ala in égzanp de kosa néna dan in zanana natirèl povréman :

ananas
All-natural pinapple, de James Kennedy, profésèr shimi, Melbourne, Australie

Lo bann mo lé inkonpréansib pou sat i koné pa la shimi, é donk i fé pèr. Mé néna in bonpé molékil konpleks dan la natir, konm vi pé vwar si lo zimaz la.
Sak poukwé na domoun i soubat souvandéfwa koméla, sé in « rotour a la natir ». Dan so zafèr la, i sépar zèt zimin ek la natir. Mé kosa lé pa natirèl ? Sak lé pa fé par zèt zimin ? Si lé koma, tir toute linz (ke i sèrv a nou pou protèz a nou si néna mové tan, sinonsa bann parazit), kas toute kaz (ke i sèrv a nou pou abrité), zèt zouti (ke lé itil pou nouri a nou, protèz a nou de bann prédatèr, pou fé la shirirzi etc), bril toute liv (ousa néna in gran parti de nout konésans, é ke nadfwa i organiz la sosyété)… Sak lé fé artifisyièlman lé pa forséman mové ou pou mèt a nou dann malizé. Néna in bonpé zégzanp : la transformasyion lo vèr, lo bann stasyion météo, la vaksinasyion, protèz médikal, lo vélo, lékstinktèr etc etc.

Pou fini

Astèr, nou lé kapab trouv lé trwa zargiman fallacieux ke nou la vi terla.
Pou ke zot i konpran byin lo démarsh terla, i di pa ke sak lé ansyin, égzotik ou natirèl lé pa bon. Sak lé espliké sé ke zis so bann zafèr la i sifi pa pou prouvé si lé byin ou éfikas. O kontrèr, in nafèr sintétik i pé èt mové, mé i prouv ryin si toute nafèr sintétik.

Pou lo proshin lartik si zargiman fallacieux, nou sa vwar lo latak ad hominem, lo faux dilemme é largiman d’autorité. Mi invit a zot komans alé trouv zinformasyion dési so bann sizé la. 

R.K.F.

(Lo lartik an fransé ==> terla)


Rosours :

http://www.charlatans.info/logique.shtml

https://cortecs.org/materiel/moisissures-argumentatives/

https://fr.wikipedia.org/wiki/Sophisme


Pou konplété :

Les Arguments Fallacieux, Hygiène Mentale (ft. Le Top 5) sur YouTube 


 

Pou alé pli lwin : 

L’appel à la nature, la Tronche en Biais sur YouTube

2 commentaires sur “« Lé vyé, i sort lwin é lé natirèl ? Oblizé lé méyèr ! » : lo zargiman fallacieux #1

  1. « na pwinn rapor ant si ou lé vyé é si ou na rézon. » Sa lé in bon manyèr traduire la fraz Corneille dans Le Cid (si mi trompe pa) : « Aux âmes bien nés, la valeur n’attend point le nombre des années ! 🙂
    Mersi bonpė pou lartik! Lé doss! Moin lé présé, le proshin i ariv !

    J'aime

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s